Житие преосвященнаго Илариона Суздальскаго ⇐ Книжный мир

[Troyy]

Оглавление святыя книги сея

Да непозазрит любовь ваша, благочестивии читатели, несмысленное мое сие плетение, яко дерзнух безумным си невежеством на сие великое дело не моея меры сущее и обесчестих е неучеными словесы своими, и изгаждательствовах неудобным и плевелным слова разчинением, и сего ради вселюбезно молю милости вашея пучину и безгневие и припадаю слезно ко святым ступенем ног ваших яко дадите ми милости ради Божия в несмыслии моем прощение, есмь бо сущий невеглас, яко бо свиния царский виноград скверным носом своим изрых. Не мощно было ми на сие слепыми си очесы и воззрети. Аз же окаянный и в дело произвести потщахся, но будите убо милосерди яко и отец наш небесный милосерд есть. Написах же убо сия не своим худостяжетельным грубоумием (Бог ми свидетель яко недостаточен есмь на се аз грешный, и не учихся мудроглаголиваго и сладкого сочинительнаго учения риторическаго, ниже и грамматическаго), но понуждением ученика его святожительныя оныя пустыни некоего монаха Даниила евреанина, ему же паче иных вложи Господь Бог о сем благое намерение, да не покрыет мрак забвения таковые трудолюбезныя доблести преподобия его, но да будет известно впредь будущия роды, а наипаче пустыни тоя святотрудолюбцем.


Сказание вкратце о житии и о трудолюбезных подвизех преосвященного Илариона, митрополита Суждальского. И како он всеусердными си рачительствы преславную и прекрасную пустыню, паче же рещи душеспасительную обитель Успения Пресвятыя Богородицы на красной Флорищевой горе нововозгради и како в ней преестественно всякия многоразличныя страсти от бесов и пакости творящих разбойников претерпел есть, и како царским благоволением возведен бысть на архиерейство богоспасаемого града Суждаля и каковы подвиги и тщание показа во проповедании слова Божия.

Егда же начинающи прошу богатодаровитыя милости Господни, да подаст разум и помощь моему грешному недостоинству на настоящее слова извещение и на удобное о сем познание; благочестивым слушателем на пользу и умиление слух чувственный паче же и сердечный внимательне да отверзет.

Предисловие

"Дивен Бог во святых Своих Бог Израилев", глаголет от Духа Святаго наученный псалмослагатель Давид: дивен есть воистину, зане дивная и чудная си дела исполняет. И пребожественных своих евангельских заповедей бремя носити облегчевает и хранити спомогает. Его же заповедей творение желающим путь есть неблазненный и во Царство Небесное беспеткновенно возводящи, по нему же шествовати не вси купно, но точию избрании удостоишася, о нем же мало нечто на сем писании приличия для привоспомянется.

Святии вси толико Бога возлюбиша, яко и души своя о Нем положиша. Превечная и единосущная мудрость Отчая Единородный Сыне и Слово Божие, егда благоволи неизреченных ради щедрот Своих и премногаго ради человеколюбия снити от высоты пребожественныя святыя Своея, и плотию восхоте (нашего ради спасения) обложити Свое Божество, странствующи по земли ходя освящая ю Пресвятым Своим шествием, проходя грады и веси и благовествуя с высоты снесенное им отеческое заповедание, и исцелевая многоразличная недугования человеческия, и чудодействуя от века неслыханными чудотворении, уча и вразумляя богоугодных заповедей творению. Между же иными и сию заповедеь пророче глаголя: "подвизайтеся внити сквозе тесныя врата, яко мнози глаголю вам взыщут и не возмогут" (Лк 13:24) и инде глаголет: "нужно есть Царство Небесное, и нужницы восхищают е", индеже и заключает глаголя: (не сия токмо, но и вся) "любяй мя заповеди моя соблюдет". Сия пресвятая уст Его словеса вкоренишася во святых Его ученицех и апостолех, такожде по них и в прочих праведницех и евангельских послушателех толь всекрепко и неудобно истерзаемо, яко никаковыми безчеловечных мучителей смертообразными прещеньми, ни огнем, ни мечем, ни злоласкательными благополучений обещательствы оставити их восхотеша. Мнози убо и от лица святых апостолов и их преемников и прочих благоверия стяжателей, непомиловаша телес своих и ниже пощадеша своего кровопролития, но аки чюждими телесы всякия многоразличныя раны и томительства мужески ополчившися и дерзновенно пострадавше, надеждею будущих благ радующеся, сим скорбным и тесным путем Небеснаго Царствия достигнути, еже и получиша доблественне. Такожде и отцы преподобные, по дальним и непроходимым пустыням скитающеся, в горах и вертепах сокрывающеся, инии же в разселинах каменных и на самых каменех пребывающе, инии же во древие дупляное вселяшеся, постом же и теплоприлежными молитвами присно подвизавшеся и иссушиша своя телеса и сим тесноскорбным путем достигоша до Царства Небесного. О них же и небесный сосуд апостол Павел предглаголет: лишени, скорбяще, озлоблени, в пустынях заблуждающе и в горах и пещерах и в пропастех земных, им же не бе достоин весь мир, инии же иными образы, воздержанием, благоговением, кротостью же и безгневием, алканием и жаждою, милостию же и незлобием, и всех времен, но земленых лишением и безплотных житию уподоблением ми предводитися усердствующе. И си уским путем стиснуша себе, вселишася в чертоги Небесного Царствия. О них же и списати подробну о именех коегождо и добродетелех невозможно есть: подобни бо суще звездному множеству, яже сиятельствы своими небесная лица украшают, их же имена и доброты единому Господу Богу известны, яко у Него написаны суще в книгах животных. Сими убо святожительными Божиими угодники вселенныя концы населяхуся, грады украшахуся, пустыни наполняхуся, церкви воздвигахуся, и домы молитвенныя составляхуся, и святые обители прославляхуся, и славно разсеяся по всему мира множеству оных добродетельное жительство. И таковых их святых селениям многим мнози есмы и мы грешни сами свидетели, ими же убо богатно Божия благодать повсюду излияся по реченному псаломника словеси: "посетил еси землю и напоил еси ю". Ни точию же велиции тии Божии угодницы, но и последователи их, чрез тыя же узкаго пути доблести прешедше, с ними же вечных и безсмертных благ улучити сподобишася, по речению самого евангельского законоположника: "их же око не виде, и ухо не слыша, и на сердце человеку не взыде, яже уготовал Бог любящим Его" (1Кор 2:9). Кто же суть любящие Его, точию святии и праведнии, сохраншии святых заповедей Его повеления, их же должни есмы вси верни хвалами венчавати по лепоте и достоянию их. Но и настоящия повести сея виновник, и дивный последних времен сих новый праведник доблестный подвижник, выше реченным Божиим угодником единоревнитель точный преосвященный архиерей Божий Иларион многих ради добродетелей своих и трудолюбезных подвигов, ими же во всей жизни своей работая и послужи яко раб верный Господеви своему, всею совершенною верою и конечным заповедей Божиих исполнением, равне уподоблением сообществуется и с множеством учеников своих, о них же зде Богу помоществующу (елико слышах от неложных устен обители его святолепных старцев) повествуется, да не покрыет глубина забвения превеликих его подвигоположениих. Бысть же начало жития его сице.

О рождении и воспитании его. Глава 1

Во странах земли нашея востока солнечнаго, в богоспасаемом Нижнем нове граде стоящем на брезе великия реки Волги, церкви Зачатия Пресвятыя Богородицы, яже в девиче монастыре, бяше некто иерей именем Анания велми благоговейного жителства, делатель прилежный евангельскаго винограда Христова, и вся заповеди Его тщайся хранити неподвижно, изряднее же и Богоподобной милости бяше подражатель, даяй на всякий день независтно требующим богатство свое, исполняя веление Господне, велегласным Исаиею пророком глаголюще: раздробляй алчущим хлеб твой, и нищия и безкровныя введи в дом твой, аще видиши нага одежи. Ему же сия богодухновенная словеса зело благонравне внушишися, алчущим хлеб свой раздробляя и питаше я, одеваше же и наготствующыя, и упокоеваше я и благодействоваше богатодаровито, со глубоким смиренномудрием служаше им: и просто рещи, не обретеся бо ни един странствующий, дабы не вкуси на трапезе его. Благословенный бо Богом дом его всяким обилием бяше, к сему же присно и церкви Божии усердно прилежа, и частыми всенощными бдении Богу ангелоподобне угождаше, хитр же бе зело и Божественнаго Писания толкованию и доволен наказовати от путей нечестия уклонятися и стремнин нечестия удалятися, и купно рещи всяку добродетель известным разсуждения словом воображаше. Не точию словесы учаше, но и делы дая образ творяше, душевредныя же и неполезныя спасению беседы не прорече слово его преподобное никогдаже, да не явит соблазна православно христианским обычаем по писанному, благий бо человек от благаго сокровища сердца своего износит благое, подобным же образом имяше и Богом дарованную си сожительницу, ей же имя Мелания, яже бяше жена благоразумная и нищелюбивая и удаляющаяся от всякия злобы.И оба ходяще бяху по заповедем Божиим выну усердно, и нелицемерную любовь друг ко другу стяжуще, страху Божию внимающе с боязненным опаством. Имуще же и чад щедрот ради владычних довольно, их же коегождо имя и житие зде множества ради оставляется. Вси убо беста законов христианских удобни совершители, но о юнейшем сыне их внем ся слову касаюся, иже рожден бысть има законным обычая ради исполнением, яко же глаголет евангелист всякое древо добро и плод добр творит, и абие молитвован бысть и нарекоша имя ему Иоанн, яже толкуется благодать Господня, воистину бо прозре о нем благодать Господня. Таково бо и имя ему дарова, яко же и предгрядущая словеса имут возвестити, и сподоблен быв святаго Крещения по лепоте благочиния церковнаго. По третьем же лете рождения его (глаголют жители места онаго) паче естественнаго обычая человеческа посажден бысть в научение божественных писаний познания, и дарованием Божиим, купно же и естественнаго разума остротою и присным желания рачением, зело спешно учашеся. И во едино четвертое лето навыче вся божественнаго Писания повести, псалмоглаголания же и прочих церковно-стяжательных стихов. В пятое же лето возраста своего начат и неученыя им книги глаголати и читати в церкви. Таже и клиросом преходя от лика к лику стихиры сказоваше, якоже святыя церкви чин обдержится и доныне, малолетнаго же ради возраста не можаше книг по церкве переносити, большими его ношены бываху. Оле превеликих судеб Бога нашего! Кто где слыша такова младенца и в толицех летех толико изучена и все церковное глаголанием и читанием дело исполняюща, аще бы не благодать Святаго Духа вразумила. Сия же зрящи отец и мати его неизглаголаннаго радования наполняхуся и великим умилением Премилостивому Богу присными молитвами своими благодарение воздающе бяху, и добродетельми паче перваго угождающе, и богодарованное чадо си со всяким благотщательством наблюдающе и страх Божий в сердце его насаждающе и смиренномудрию поучающе. Отрок благоестествен сый внимая усердно родителей своих учению возрастая преспеваше в поучаемом ими страсе Божии. И изволи приметати себе в дому Господнем и внем ся зело благоохотно святых книг прочитанию и в них лежащего разума разсуждению. Елика же неудобно разумеваема ему сообретахуся, вопрошаше отца своего (зане зело искусен сему бяше), он же отечески многоплодовитыми словесы вразумляя его, и обучая умудрятися ко спасению, внимая же он писаше на скрижалех сердца своего. Детонравных же обыкностей и игр весма ошаявашеся и ниже зрение си на то обращаше, но и скоростне того отбегаше. И того ради сверстницы завистодержне снедаемы бываху и ненавидяху его, но Бог помоществующу ничесо же ему содеяти могуще. Благодать же Божия множашеся на нем, от человек же честь и слава, не токмо ему, но и родителем его.

О преселении отца его из града и о скончании его и прилежном его книгопочитании. Глава 2

По некиих же временех преселшуся отцу его в пределы того же града в весь Кириково нарицаемую, стоящую на реце Сундовике к церкви Успения Пресвятыя Богородицы с домашними своими, и теми же добротельми богоугождающу и чада своя добре наказующу, наипаче же сего отрока умудряюще. По сих же матери его отшедшей от жития и отроку зело опечалившуся, но утешаем бе благоразумными словесы отца своего. Таже по некоем времени утаився от всех чад своих отец их, и отшед облечеся во иноческий образ, и преименован бе Антонием и о сем отроку великая и горесть приснослезная нанесеся, но мужеумным си разсуждением положи упование на Господа Бога и на Пречистую Его Богоматерь и ходя ко отцу своему утешаяся и наставляяся от него всякаго благоразумия. Наипаче же наказуем бываше да бы присно придержася крепце читания книжного. По некоем же времени и отцу его конец жития приимшу: и душу свою Всемогущему Богу предавшу, чадом же своим в мире и любви жити благословение подавшу, и вручившу их милости Божией, таже и болшему их брату и повеле их всячески наблюдати и ни в чесом не презирати. Наипаче же о сем вышереченному отроце Иоанне изволи попечение имети, дабы потщахся в себе место всячески снабдевати. И бяше отрок зело печалуя, таже ово брата своего утешением, ово и своим благим разумом разсуждая утешение приемляше. Некогда же читающу благоразумному сему отроку Иоанну послание святаго апостола Павла и дойде места идеже бе написано "всяко писание богодухновенно и полезно есть ко учению, ко обличению и к наказанию". Сообрете же согласие сему и во святом Евангелии, глаголющее: "испытайте писания, яко в них имате обрести себе живот вечный". И сия словеса более разжедще его крепце о снискании божественных писаний. И прочитая с великоудобным разумением ветхозаконныя и новой благодати книг, такожде и жития святых и богоносных отец и различныя Златоустова и иных святых отец поучительная словеса, и сих уразуме яко преходит мир сей и яже в нем суетная дела, и помышления лстяща человеков, к сим же и страшнаго суда пришествие и будущих благ уготовление, и грозных мук сбытие и сими умиляяся и устрашаяся, устреми паче умных си очес зрение возглядати на едину нестареемую жизнь, и бяше растый добре красотою тела, краснейший же душею цветяшеся и к церкви присно приходя на всякое славословие и не бе никто же дабы кто первее его ко церкви сообрелся, такожде и из церкве послежде изшел есть, и сие творя на всяк день.

О бракосочетании и вдовстве его. Глава 3

Апостол глаголет: лучше есть женитися, нежели разжену похотми явитися. В таковых же убо доблестех благоговейну сему отроку Иоанну благодати ради Божия возрастом и разумом спеющу и по предначатому богоугодных дел пути шествующу, привременных же и удобовядаемых земено временных благ со опаством ошаюшуся, ии на всякий день душевное богатство от святых книг собирающу и в сокровищи сердца своего снабдевающу, достиже от рождения си лета шестонадесятого, и положиша намерение болший брат его и прочии сродницы бракосочетанием венчати, и начаша молити его ово по единому, овоже и вси купно, глаголюще: да поимет невесту в сочетание себе, желающе видеть чада от него. Он же отрицательне глаголаше ко сродником своим, да не сотворят ему препятия ко спасению, и дане соодолеют домовная попечения, якоже избранный сосуд глаголет: "неоженивыйся печется о господних, како угодити Господеви, а оженивйся печется о мирских, како угодити жене" (1Кор 7:32-33). Аз же имею желание како бы сохранити чистоту душевную и телесную и восприяти на ся чин иночества и непекшися о мирских угодити Господеви. Брат же его благоразмуен сый, много зная достизания во нравоестественных обычаех человеческих и глаголаше к нему: что се глаголеши, возлюбленный мой брате, или мниши женитвою сине угодиши Господеви. Несть, брате мой, правостти в сицевом твоем разсуждении или не веси того же апостола глаголюща сице: брак честен и ложе нескверно. Како убо глаголеши примеситися скверне телеси твоему, а наипаче же воспомяни егда издревле Бог созда человека и дав ему помощницу и благословив их, раститися и множитися повеле. Отрок же отвеща: о Адаме ли глаголеши, премилостивый мой брате, вем убо яко женою прельщен был и от рая изгнася. Брат же восприим слово и отвеща глаголя: аще ли мниши тако во древним патриархом браку сочетатися, от них же велиции Божии угодницы прозябоша и великими добродетелей цветы просияша и видения Его сподобишася. Такожде и в новой благодати не читал ли еси многих со женами спасшихся, такожде и жены многих мужей спасоша. Или не веси яко Спаситель наш в Кане Галилейской брак пришествием Своем освятил есть, но и первых чюдотворением воды в вино преложением удивил есть, но не помышляй, любезный мой, сицеваго, не имать то быти грех, но закон богоблагословенный. Отрок же отвеща: вем, брате, яко брак аще и честен есть, но честнее его богоугодная чистота, девственная. Не начинай выше меры деяния, брате, на высокая бо дерзаеши, но блюдися от сих, да не ниспадеши, но лучше есть мене послушати, или мниши мене не благо ти советующа, но послушай и припомяни жизнь отца твоего како име житие свое и ничо ему сотвори мати наша препятия ко творению добродетелей, но кую ползу возобрящеши себе от Бога. Аще мене опечалиши благое ти советующа, послежде негли раскаятися имаши, умилися не сотвори отриновенно беседование мое. Сия же и ина многа подобна сим словеса умягчиша сердце доблеразумнаго отрока и отшед на место сокровенно дому отца своего и пад ниц пред образом Спаса Христа и умилно восплака глаголаше: Премилостивый Владыко и Господи, Ты веси коегождо человека сердечное предложение, призри на недостоинство мое и сотвори со мною по воли святей Твоей и ина подобна сим словеса, и утишився мало изшед глагола брату своему: твое изволение буди, благодетелю мой, не хощу ти преслушник быти, разумех бо яко всесовершенно имаши о мне полезное попечение. Ей, брате мой, несть ми о сем ни помышления нежели желания, но буди твое благоволение. И тако повинувся, умом же помышляя, аще бо и сотворю по воли его, но не коснуся ей смешением, и сохраню девство мое, или не гли скоро по браце пожата будет смертно жена моя. И аз свободен буду и брат мой паки не понудит мя, и желание мое совершу радостне. Сия же ему мыслящу праведне и провещающу сердцем, Богу же предзряще будущая, якоже и последствующи гласом имать явити. Слышав же брат его тая снисходная словеса возрадовася и повеле сродником своем испытовати отроковицы предобрыя и наипаче сам испытуя опасно како бы возмогл изобрести купно нравну и единомысленну ему супружницу, паче бы и смирену. И благословением Божиим обретше избранную девицу именем Ксению от рода священническаго, по времени же удобном обручивше и венчаша по обычаю православно христианскому и бысть радость велика сродником и знаемым в доме отца его. По вечери благословив их брат спутствоваше же родителие их до чертога женитвеннаго и отздратствоваше отъидоша. И начен увещевати новобрачную си да сохранит к нему любовь непритворную в тайности неискусобрачная, она же целомудренна сущи внимаше молчащи глаголанным от него. И тако живущи бяху неколико дней кроме сочетания, читая бо присно святых книг повествования, разсудными же словесы сказоваше и сожителнице своей, по вся же ночи востающе и содержаху правило молитвенное иноческаго обычая. По днех же некиих уразумеша сродницы их, яко несть у них соуза любве общевсенароднаго и приступль некий от них на едине: или лстивнолобызательне или и правдою и начен глаголати: вскую, любезный наш брате, таиши от нас промысл твоего произволения и почто несоизволяеши детелне к сочетанной ти супружнице законнаго обычая или мниши тайно веден быти мыслей человеческих или не любиши ю каковых ради примерностей или не мниши быти в ней огня природоестественнаго. Аще ты по богадарованной ти крепости и имаши воздержатися, она же невозмогше соодолети нужде же настоящей и утаившися некогда исполнит си плотоугодие. Богу же на тя винность греха возложит. Ты же не даси ли за ню ответа в день всемирнаго испытания, но престани высокомудрствовати любезне, удобно ти во образ благое жития отца твоего да будет и тем имаше не преткновенно до Царства Небеснаго достигнути. Благонравный же он, благопослушлив сый в нем реченных глагол силу и разсмотрив в Писании, яко то сочетание во грех не вменяется и соизволи по изволению их быти. По сих же толикою любовию с новобрачною си связавшеся, яко друг без друга ни хлеб ядуща, таковую бо любовь и союз дарова им Бог, яко да весть он истинне тоя любве силу и в прочих человецех.

О болезни и смерти жены его. Глава 4

Не по мнозе же времени яко по шести месяцех коснуся жене его тяжкая болезнь, образующая пришествие смерти ея, он же то созерцая начен болезненно сердцем уязвлятися, понеже зело любя ю яко свое тело, паче же рещи и душу по неже во всем ему сообрелася благоугодна. Тайно же и явственно из глубины внутренния горко плакаше и раскаиваяся о преждереченных своих мыслях вещая бо сердце его яко любезный их союз разрушается не точию на время, но и на веки разлучается и сего ради умилно моля Бога Всемилостиваго, да подаст ей облегчение от належащей болезни, но не благоволи Господь Бог томы збытися, весть бо комуждо прошение даяти к полезному спасению и не даяти же зане весть комуждо к повреждению. Тяжко бо болезнующей же сожительнице его через толикоже месяцей и отъиде ко Господу душа ея и припадшу же ему к мертвому телеси ея и горко возстена и плаче воплствуя глаголаше: о люте моего несчастия и злополучения! О люте моего вдовства младолетнаго! О люте ми срамоты и безчестия! Облекохся во стыд и поношение всем человеком. Не хотех было браком сочетатися, днесь же не могу претерпети разлучения. О Премилостивый Владыко и Господи видимых и невидимых Творче и Содетелю, призри, свете мой, невечерним Твоим осиянием, просвети окаянную душу мою тмою горести омраченную, коснися, радосте моя, непрестанному терзанию сердца моего и устави злогорестное ми воздыхание, изми, благодетелю мой, острое копье от утробы моея, утоли, сладосте моя злогорестное мое плачевопльство неудержимое, разжени, солнце праведное, темноносный облак сицевыя печали моея, укроти, милосерде, несмысленное мое о сем обуревание, посуши, благодате моя, неразсудныя источники слез моих, вем убо вем несумнительная надеждо моя, яко неисповедимы суть щедроты человеколюбия Твоего, но не могу престати от сего жалостескорбнаго нашествия. Сия же и ина многа слезоточне глаголаше. Рыдающе же неутешно и родители еа. По таковем же мнозем всеоблезновании прискорбном певшая надгробная над телом ея и погребоша ю. Отроку же от великия туги сердечныя скорбящу и слезоточащу присно. Брат же его зря от толикия печали зелне утесняема по многая времена утешаше его глаголя: возлюбленный мой брате, свете сладчайший очию моею, аз виновен твоему болезненному воздыханию, аз, брате, точен скорбному ти наведению, аз ти соделах толикое слезоточное рыдание, но послушая, молю тя словес моих внимателне, а паче мене послушай Божественнаго Писания, несть бо добро, брате, в безмерную печаль предавшуся изнемогати, но паче смиритися пред Богом, нашедшаго ради плачетворения и вся тая возложити на Господа Бога по рекшему псалмопевца словеси: "возверзи на Господа печаль твою" или паки "его же бо любит Господь, того и наказует, биет же всякаго сына его же приемлет" или сам, чадо, не читал ли еси глаголющаго: "не даждь печали души твоей", многих бо погуби печаль гибелию вечною, что бо имаши успети настоящим ти непослушанием, первее убо Бога на гнев подвизаеши и на святыя его судьбы пророк наприносиши, яко бы не весть коемуждо что к ползе строити. Мене же горестию наполняеши и присно слезными токи облагаеши и всем сродником нашим велие наводиши уныние, себе же безразсудно сокрушаеши, престани, любезный мой, слезоточне печаловатися, не повреди света очес твоих, не изгуби разума честнейшаго, не истреби плачевным ти сетованием богодарованнаго ти таланта о заповедех Господних попечения, наблюдай, брате, душу твою, что имаши возответовати в день страшнаго Христова Пришествия, остави, брате, временную печаль сию, от нее бо происходит смерть душегубительная, вреждающая человеки, ибо печаль сотворити доброе ничтоже может, точию вредотворит разума полность и сердца крепость. Аще ли же, превозлюбленный мой, не можеши от сего обстояния удержатися или помышляеши плотоестественнаго ти огня пламенно соодолети тя, аз ти и вторый совет на то изрицаю (есть ли восхощеши), да и второбрачием тя имам благословити, благолепием же и разумом все подобну первей изберу ти, точию престани от сего злаго деяния, доброразсудный же он юноша внушив брата своего благоуветливым глаголом. Господу подавшу крепость день от дне помалу от печали ошаявашеся, совершенно же отринути ю не возможе, о второбракосочетании же не восхоте и помыслити. Сия убо скоростне зде глаголются, истина же дела продолжашеся, и тако ему лютобурно о вдовственной печали колеблющуся и терпящу великое от мысли утеснение и соблазнов лютое злонашествие, случися некогда и удивлению достойная повесть, яже аще и неприлична кому возомнится, но ведая убояхся потаити целомудренное воздержание его.

О целомудренном воздержании отрока. Глава 5

Некогда убо уединившуся блаженному сему отроку и досточюдному Иоанну и читающу попрежде обычному си хотению божественных книг повествования, и абие вшедши к нему некая дева зело благообразна и девическими лепотами украшена и наченши слушати чтения его прилежно и о недоумеваемых словесех вопрошающи и умилным лицем и тихим зраком неотвратно смотряще нань и блуднически зряще и лстящися. Многокозненный же демон коснуся мысли его еже бы хотети ея, но Бог Всемилостивый храняше его, таково убо укрепися яко ни единою не воззрев на ню. Аще бо помыслом и мятущимся, но не соврати очес своих от Писания, по многом же чтении его и слушании оныя восставши, абие оная дева безстыдным лицем не возмогши терпети красоты его, и приближився охапи его и хотящи лобзати и, воспрянув же убо скоро и хоте избежати иосифоподобным равенством, но удержан бысть крепко руками ея и абие похвати бич лежащий ту и начат без милости великосилными ударении ранити (бити) ю на мног час по лицу и по прочим удесем ея. Она же от великаго плотожелания ни мало слышавше биения его, но усиляяся перводелию касаяся, он же видя яко не может биением соодолети ея, торгнувся всесилно из рук ея и скорошественным бегством избежа из храмины тоя вся оставиши. Подобна же сему и ина вещь содеяся в тех же летех вдовства его. Первообразным бо равенством седящу ему паки уединену и поучающуся в законе Господни и найде нань уныние о женолишении и распалися в нем пламень огня естественнаго (знает бо огнь сей мужие средовечия живущии, а наипаче иноческаго жития крепко содержатели, коль жестоко есть паление огня сего) и толико жгущи его, яко едва не сложися ко снисканию хотения. Сие же наведе на него враг душегубительный, восхоте бо тоя ради нечистоты удалити и от милости Божия, и абие вниде к нему некая жена демонским наваждением (пачеже отцу его знаемо бе) и борзо нападше нань хотящи понудити его на блудное смешение, он же содрогнувся страхом Божиим и выскочи скоро из храмины тоя и утече, и пребысть шествием труждаяся весь день до вечера и тако избы греха милостию Божиею и помыслы труда его ради на мало дней отступиша. Но не точию же сия, но и ина паки дивнее сих быша, их же стыждуся зде писанием изъявити, колико он пострада ратуем от супостата демона, сим плотолюбным опаляем пламенем, иногда бо он проклятый враг преобразися во образ умершия жены его и приступивши к нему на едине глаголаше, почто любезный мой, печалию утесняеши сердце твое жалеющи моего умертвия, аз же слышащи твое горькое воздыхание и плачевное стенание и приидох посетити тя, да зревши мя малу отраду утешения восприимеши, аще ли же хощеши приближися ко мне да лобзаемся и сотворим по прешедшему обычаю совокупление. Целомудренный же отрок позна козни вражия и воздухну из глубины сердца и сотворив молитву, знаменався крестным знамением и абие невидым бысть искуситель оный. Паки же и ина многа бес напаствоваше ему со иными и явными мечтании и многоразличными покусы подступаше ему, но от всех сих Господем Богом избавляшеся, присно бо имаше во уме своем страх Божий и час смертный и будущее мучение. Аще бо и общенародный сей нрав в человецех и с человеком рожденный, но весма от него раб Божий укрепися, да не возмнит кто о сем от читателей искусных яко бы се слово порицательное и святому его житию не пристойное или от лжи внесенное, но есть се правая истина и от неложных устен слышанная. Зде же о сих сокращается и оставляется и настоящее слово, паки плодотворится отчасти.

О принуждении его к второбрачию и о отшествии от дому отча. Глава 6

По сих же согласившеся сродницы его и начаша молити и яко послушает их и приобщится второму браку. Слышав же он боголюбивый отрок Иоанн таковые сродник своих глаголы и зело опечалися, зане не к полезному его строительству советующе бяху и отвеща глаголя: возлюблении мои сродницы, что вы ползует еже смущати во мне дух мой, благости ли вы мне усердствуете или погубити мя хощете. Радости ли вы мне желаете или паче слезы точити ми притворяете. К Богу ли мне присвояете или паче чюжда сотворяете: престаните, вселюбезнии мои, сие пусто...плодотворити словоположение, Бог ми свидетель яко не имам вас о сем послушати, что ми убо первый брак содела ползования, не в великую ли горесть облече душу мою, сей же ли благосоделати что может. Тамо убо вместо радостнаго ми ликовствования обыдет мя слезоточное сетование. Зде же ли убо вмсто плачевоплства возобрящу радостотворение, воистину несть мощно любезнии мои сему збытия, престаните усердно, молю вы от сих злоначинаний ваших и не внимаю бо сердечными ушима на умножение заключений беседования вашего. Вем убо аще и злостражду от сих телом, но молю Бога моего да подаст ми силу к терпению и да возмогу душею усиловати по апостолскому словеси: елико внешний наш человек изнемогает, толико внутренний обновляется. Они слышавше дивляхуся велеразумным ответом его, но не престаша от начинаний своих и паки бо по многая времена един по единому приступающе глаголаху ему, да изволит быти согласен советом их, он же таяжде и ина многоподобна возответоваше им, они же паки излишше глаголаху: аще ли не послушаеши ны имамы тя усилством бракозаконити. Слышав же тая доблий он юноша, страхом ужасеся и умысли бежати от дому отца своего, сие бо помышление еще от юных лет зело соодолеваше ему и дабы сподобитися иноческаго образа, ибо на се часто Богом позываем бяше и обещася. Не приспевшу же времени по малу отлагаше, восхоте убо некогда сие хотение и отринути чрез препятие некиих помыслов, тогда и болезнию очес си пострада, обещався же ся исполнити, паки уздрав. Сие же бысть и не единою, днесь же прииде время с радостию на дело дерзаше, усмотрив убо время подобно и абие утаився всех, остави дом отца своего и уступи сродства велехвалнаго и всех благих временно земленых вещей ошаяся, подражатель явися спасителным словам Господа Бога евангельским заповедем: "аще кто хощет по мне итти да отвержется себе и возмет крест свой и по мне грядет" и прочая, и пойде в путь свой душевно радуяся, идущи моляся тепло прилежно глаголаше со псаломником: "скажи Господи путь вонь же пойду, яко к Тебе взях душу мою и научи мя творити волю Твою яко ты еси Бог мой. Изведи из темницы душу мою, исповедатися имени Твоему и ими же веси судьбами спаси мя недостойнаго раба Твоего". Таковая убо и болша сих слезоточне глаголаше и идяше аможе Господь наставит его. Призре же на молитву его Господь Бог, весть бо путь праведных и вложи ему мысль ити ко преосвященному епископу Павлу Коломенскому и восприим благословение вопросити о душеспасительных деяниих. Епископ же той бе знаем ему, а паче и сродством совокупляем сый, ибо со сестрою епископа того бракозаконен бе. Богу же помогающу достиже града Коломны и получив желаемое от епископа того благословение и присвоен бысть им жити во епископле дворе (доме) его, он же вдадеся ему в послушание и бяше во всем повинуяся усердно. Бе же той епископ читатель Божественнаго Писания и добре веды наставляти к Богу шествующия и начен увещати его да облечется во иноческий образ, он же с радостию желаше улучити глаголанное, понеже на то восприятие Господь Бог и приведе его. Вдовствуя же бе шестолетно и ко иноческому житию во всех тех летех приобыкая усердно. Пострижен же быв в 22 лето рождения его.

О пострижении и о житии его во граде Коломне, никто же Богу. Глава 7

По сих вышереченный епископ постризает власы главы его и облече во святый иноческаго подобия Ангельский образ 160 лета декабря в 13 день и преименова имя его, по разуму божественных писаний, истинному пути спасения и монашеских законоуставных преданий. Он же яко истинный сыно послушания во всем повинуяся ему и с радостию творяще заповедания и пребывая присно в молитвах и во всенощных бдениих томя юность телесе своего и крепкаго постничества браздою воздержашеся от страстных нахождений и многоценный истиннаго страха Божия бисер в правоверной душе своей опасно соблюдаше. Пищу же имяше зело умалену и жаждею присно сердце свое согнетая, на многи же дни ничесоже вкушая, ибо возлюби совершенно тяжкий ярем Христов и скорбный тесный путь. Сего ради и крест свой на рамо взем последуя подвигоположнику своему, благоохотным же книжнаго читания разсуждением многия вещи без сна препровождая. Зрящи же его вышепоминаемый епископ таковыя добродетели проходяща велми Бога благодаряще, паче же и моляшеся яко да пост ему помощь начатый путь добре проходя окончати. По времени же некоем и во иеродиаконство рукоположи его, таже ризничества службу поручи ему и в новопоставляемыя иереи же и диаконы ведати повеле. Он же вся тая и нехотя восприим и начен более смирятися, внимая бо яко преходит мир сей и яже в нем суетная дела и помышления лстяща человеки, мзды же никакоже коснуся и ниже озлобити кого восхоте, брашна же сладостнаго и одежды светлыя и всякаго телеснаго угодия зело удаляяся и всяким хранением сердце свое блюсти тщашеся и ко всем по Бозе любовию украшен бяше и сего ради всеми любим бываше. Он же зело ненавидя славы от человек, возжела бо уединение и пустыннаго жительства пребывание, како бы удалитися от многосуетия возложеннаго нань и без всякаго препятия послужити праводю Господеви Богу своему. Сего ради и часто моляся глаголаше: "скажи ми Господи путь вонь же пойду, яко к Тебе взях душу мою". Таже и слезоизлительне просяще "кто даст ми крыле яко голубине и полещу и почию", не хощу бо чести скороисчезающия, не желаю славы долувлекущия, не требую богатства душетленнаго, ни сластей на душу воюющих, вся ко сия лукаваго диавола удица, к погибели коегождо влекущая и таковая ему присно размышляющу и спасительная словеса внемлющу.

О временех книжнаго исправления. Глава 8

Приспевшим же лето вняже благоволи Господь Бог по неизреченной Своей милости архипастырство восприяти всероссийскаго многочисленнаго народа к небесным блаженствам руководителю, великому господину святейшему кир Никону богомудрому патриарху царствующаго великаго града Москвы и всея России и мудроразумным его разсуждением и благоволением великаго государя царя и великаго князя Алексия Михайловича всея великия и малыя и белыя России самодержца, истиннаго по благочестии поборника, купно же и благословением вселенских патриархов и советом всероссийских архиереов, начася исправление в погрешительных книжнаго существа делех навершати, такожде и благочинное священнослужение соглашати противу греческих и древних российских рукописанных переводов, к сим же и о треперстном креста Господня сложении и о прочих вещех. Слух же начался обносити во вся страны всероссийскаго царствия от неразумных и скудоумных неученых человек, яко бы повредися наше благочестие христианское и не право нача быти в книгах печатное тиснение и непротиву святых отец предания, яко бы своевольным хотением и изменена глаголюще в книгах многая словеса ересеподобным равенством и священнослужение божественныя Литургии превращено смышляюще лукавым намерением. К сим же и святейшаго архипастыря Никона богомудраго патриарха московского (и всея России) злолукавыми и ложными словесы своими порицающе и укаряюще и неистовыми глаголы несмысленне поношающе, яко бы он великий господин наш премудрый архипастырь явился в странах нашим первым ересеначальником. О, не дай, ГОсподи, правоверным сего и помыслити никогдаже (таковы же слух промчеся ложно во вся страны российския). Благочестиваго же государя царя и великаго князя Алексия Михайловича всея России, истиннаго по благочестии поборника и восточныя святыя церкве послушателя злодосадительными поношенми посрамощающе и треклятая си уста разстворяюще лаяху псонравным подобеством, а неиспытавше истины и неразсмотривше настоящаго разума и от таковаго случая мнози великих чинов людие и простых народов сонмища прелестно соблазнишася, чающе быти тому слуху в правости. Множество же и от священноначальников и священников и прочаго церковнаго чина сослужителей, тем же слухом оболстившеся, святыя матере нашея церкве единства отпадоша самоволне, мнозии же от различных чинов и души своя вечно погубиша самоубийственнее, инии же и в бегство далним странам предавшеся, зде же (о сих плодити) за множество оставляется. Хотящим же о сем ведети, да изобрящут на се изданныя печатным тиснением книги. Донесошаже ся слуха сего словеса и прежде помянутому града Коломны епископу Павлу и смятоша его боголюбивую душу и неведый что сотворити в великое недоумение и печаль преложися и в горести си не испытав о сем истины от доброразсудных и мудрых (ученых) человек, но вопроси неких малоученых и неискусных на се разсуждителей. Они же непокорством обстоими и сами едини мнящеся быти мудры на все то гадательство изнесоша и преосвященнаго епископа на болшее сумнение воздвигоша. Он же дошед царствующаго града Москвы и советова людопрением великому государю такожде и святейшему патриарху и всему освященному собору таковое новоначатое дело оставити и до конца истребити и многомолим быв не послуша, паче же и словеса некая приличная досады изрече и того ради от них великаго государя и святейшаго патриарха и прочих архиереов и в заточение послася. Вся же сия созерцая святожительный иеродиакон Иларион, о нем же и сказание зде надлежит в велик страх впаде, паче же и ужас нестерпим сердце его стисну и печаль немала объя его и по малых днех разсудив и положи упование на Господа Бога, яко той есть начало и конец всякаго благотворения и по сем начат присно помышляти како бы изобрел где место пустыннное и ко спасению удобное и от жилищ мирских удаленное. И таковое желание убеждаше его, иде некоему рабу Божию и поведа ему о настоящем своем благохотении и яко вседушным речением желание то исполнити. Раб же Божий позна яко добр сосуд имать быть Духу Святому и отвеща глаголя: Господь Бог да исправит стопы твоя яко же хочет, ты же дерзай не сумненно и утверждайся верою еже во Христа Бога и к будущим надеждам взирая, от всех злодейств (сует) удаляйся и возжеланному ти пути касайся о Господе. Слышав же тая возвеселися и благодарив Бога на путь уготовляшеся.

О пришествии его в пустыню Флорищевой горы. Глава 9

Таже избра день предначатыя мысли желание начен, припаде бо первее пред образом Спаса Христа, и воздохну из глубины сердечныя и слезами облияся глаголя: Господи Иисусе Христе Сыне Бога Живаго, спутешествуй мне грешному рабу Твоему и призри всевидящим ти оком на сердечное предложение и сотвори промысл ко спасению моему уодбный и даждь правдою поработати Тебе содетелю всех и не отрини мене послужити Ти дерзающа и сам Владыко настави мя на истину Твою и научи мя творити волю Твою и изведи от настоящия печали душу мою, зане сердце мое мятется во мне, боязнь же и трепет вредителне колеблют мя, яко да бы исправилися быша путие мои сохранити оправдания Твоя, да не постыжуся в начинании моем. Также и ина многа моляся глаголаше и пойде в путь желаемый ко граду Гороховцу, слышал бо бяше отдавна, яко в пределех града того есть место ко спасению единствующих, зело удобное и красное, за рекою Клязьмою, на красном и мало проходимом бору, на горе именуемой Фролищеве стоящей на брезе реки глаголемыя Луха и от слышания того велми любовию распалися и идяше радуяся и елико более путешествуя труждашеся, толико более и благохотение ему множашеся и тако Богу помогающу достиже града того и начен опасною тихостию вопрошати живущыя ту, где есть место Фролищевы горы и дарова ему Господь Бог таковаго человека иже совершенно зная путь той. По неких же днех и доведе его вышереченнаго онаго желаемаго им места, идущим же им частотою леса того (ибо тогда еще не бе право изследованнаго пути, но просто по неким признакам ходяше) и взирая на красоту высокорастущаго ту древия и возлюби яко рай Божий место то, таже приидоста и на ону вышереченную гору и сказа ему водя его, яко то ест место желаемое тобою в нем же аще хощеши спасайся о Господе. Гора же тая еще тогда мало зело населена бе святожительными монахами (ныне же яко доброкласная нива присно плодоносящи чистую пшеницу сторичественными плоды), но толико бяше жительствующи трудлюбезными подвиги четыре брата, в них же первенствуя именем Мефодий, святое и постное о Господе проходя житие и равноангельское имея пребывание, тому же подобне и прочии с ним. Пришед же и припаде ко святым оным пустынножителем и глаголя со умилением, приимите убо и мене, о отцы святии, во святое сие место ко своему люботрудному пребыванию, да потруждаюся елико ми Господь Бог подаст помоществования и спасу грешную душу мою, от младенчества бо желах велиим рачением пустыннолюбнаго и многотруднаго жительствования и присно молихся да сподоблюся таковаго рачительства и се дарова ми Премилостивый Господь Бог время благополучное и довел мя есть до вашего святаго и ангелоподобнаго пребывания. И всею крепостию души моя возлюбих святое и душеспасительное место сие и аще благоволит щедротами Своими Царь Небесный, не имам отитти отселе и до дне смерти моея. Они же слышавше велми Бога благодарствоваша яко дарует им таковаго человека разумнаго и испытавше его глаголюще: кто еси ты рабе Божий и како твое имя и откуду до нас грешных пришел еси: еда от некоего злобедствования или инаго каковаго любоприлучая загнался еси семо. Он же отвеща: Господь Бог свидетель яко несмь еже глаголете, но всею усердною верою притекох семо ища и любя пустыннаго пребывания и многотруднаго жительства. Аще ми и горесть прилучится и смысл опечалит сердце мое, подаст же Господь помощи, сладце имам терпети и о вас отцех веселити, таже сказа им и имя свое. Они же в мале времени зело возлюбивше его и провидевше доброе его намерение, благоволиша ему пребывати с собою.

[Troyy]

О трудах и подвизех его и о принуждении на иеромонашество. Глава 10

Восприим же он благословение их и вдадеся им в покорение и послушание, сохраняя заповеди Божия и пребывая с ними в посте и молитвах присно, по неких же днех толико на добродетельные труды подвигнуся, яко и старцем оным дивитися ему, ибо чрез вся нощи бдя, в молитвах преклоняя колена Господеви своему и в поучении книжнаго прочитания себе упраждняя и присно божественными словесы питая душу свою и великим воздержанием удручая тело свое, час же смертный непрестанно имея во уме своем и на суд страшный выну угтовляшеся и разумеша о нем яко дивен имать люботрудник быти, от великих подвигов паче же и велик наставник монашескаго жительства от почитания и разсуждения закона Божия и часто приходяще к нему и слушающе наслаждахуся сладце душеспасительными словесы его и велми благодарение воздающе Господеви яко дарует им своего сущаго пастыря на место то пустынное, возлюби же его и игумен иже часте к ним приходя из Ярополча Благовещенскаго Пресвятыя Богородицы монастыря, который пастырствуя их и снабдевая души их руководствуя до Царства Небеснаго, сей бо прежде пришествия сего иеродиакона Илариона и первыя церкве сущия ту основание положи яже по многом стоянии згоре и сам первее всех первое на ту церковь древо посече и в делании прилежный помощник быв. Соделаша же ю сами своими руками в легком древии кроме древоделателей, и тако за поспешением Божиим и совершися по достоянию, таже и священа бысть за двадцать седмиц пред пришествием его, святися же во имя Успения Пресвятыя Владычицы нашея Богородицы, придел же здан бысть во имя преподобнаго нашего отца Ефрема Сирина, но не свяшен бысть до преподобия его. Прежде же церковнаго здания и во время созидания по доволному пустынножительству нескудно бе, инии же невозмогше пустыннотруднаго пребывания разыдошася. Точию остася вышереченный первоначальник пустыни тоя Мефодий с прочими трема браты, к ним же и сей иеродиакон Иларион прииде, житие же их прежде церкве бе идеже ныне огород пустынный, место же идеже ныне монастырь избраша красоты ради церковному стоянию, тако Господу благоволившу и келии пренесоша, таже и новые на собрание братства возградивше. Вся же сия быша до пришествия его, но пришедшу, но пришедшу ему на сие место идеже ныне благодатиею Божиею стоит святая обитель, вкратце же о сем поведано зде и оставися, но к настоящему паки словеси возвратимся, по пришествии же его паки помалу начася братство собирати и купно вси о Господе труждающеся пребываху, но паче всех сей иеродиакон Иларион постное и молитвенное препровождаше житие и удивляя крепким воздержанием сущих ту, ибо присно видяще его своеволным хотением алчуща и жаждуща и мало сна приемлюща, но в законе Божии поучающаяся и великими труды телесными и духовными мучаща тело свое. За таковое же его богоугодное и добродетельное житие и благонравный обычай все братство возлюбивше зело и наставником себе нарицающе.

О принуждении его от братии на иеромонашество. Глава 11

По сих же начаша молити его великим прошением паче же и понуждаем бывает яко да восприимет священничества рукоположение и да будет им пастырь и вождь ко спасению и наставник душ их. Он же чрез многое время отрицаяся глаголаше: яко несмь святии отцы и братия на таковое великое удобен восприятие, аз не паствити, но сам пастися приидох семо, не вас наставляти, но наставлятися от вашего преподобия, не спасти вы притекох, но спасатися вашими святыми и богоприятными молитвами, не вас научати, но сам житию и нравом иноческим от вас навыкнути. Они же излишне моляху его глаголюще: не скрывай святче Божий богопорученнаго ти таланта о заповедех господних учительнаго попечения. Но спаси себе на месте сем себе и нас усердно молим тя. Аще ли не полсушаеши ны вси имамы отсюду разытися, но вемы бо от некоего извещения яко тебе поручает Господь Бог и Пресвятая Богородица место сие, строити же и снабдевати ко исправлению нашего спасения. Он же Богу восхотевшу возре на плоды послушания и не могий отрицатися многому их прилежному молению и нехотя повинуся и пойдя во царствующий град Москву с молебным от братии писанием и освящен быв иеромонашества приятием благословением и рукоположением святейшаго патриарха Никона и с миром Божиим отпущен, прииде ко братству своего и по достодолжной обыкности с велию честию сретаем бывает и вшед в церковь Успения Пресвятыя Богородицы и соверши церковнаго определения исполнение, таже и от закона Божия начен поучати богодарованное братства сочетание учаше же не хитросплетенными словесы, но удобными и препростым к познанию и оттоле толико внемся учительству яко не единаго дне оставити ему без проповеди слова Божия, колим же доброделем учаше братию, толиких всех сам храня образ даяше. Во всяком же пустынном люботрудном делании благохотнее всех труждаяся, копая землю и садя плоды и взимая дрова секий и воду носяй, но и в сих трудех глаголя словеса божественныя воли и сея семя благочествивыя веры. Быша бо словеса его целомудренна и полна суща духовнаго учения и напаяюща сердца братии своея сладоточною струею душеспасительных вод, они же от сладости его глаголов толма на духовную любовь уловлены быша яко и до смерти кождо своей соводворятися ту обещание положиша. Видевшу же ему таковое их послушание и с великим умилением благодарение Господеви возслаше и на помощь себе святое Его имя призывая глаголаше: помози ми, Боже Спасителю наш, тещи путем тесным и скорбным монашескаго предания яко уязвихся Твоею любовию аз и прилпе дух мой по Тебе Христе Боже мой, сохрани мя безпреткновенна святою ти десницею, Тебе бо ради удалихся бегая и водворихся в пустыню сию, чаю Тя спасающаго мя от малодушия и бури, не соврати мене Господи от желания моего и исполни очеса моя слез духовных и укрепи сердце и мысль мою да не поползнуся от Тебе немощию моею, подай ми силу избыти брани вражия или победити их, не остави мене, ГОсподи Боже мой, и не отступи от мене, вонми в помощь мою и покажи мя грешнаго сим рабом Твоим ко спасению предводителя и буди ми помощник учитися и учити удобному ти Спасителю мой жительству. Сия же и ина многоподобна сим моляся слезно ко Господу беседоваше и вседушными молбами приединяяся ему присно и тако шествия си дело монашеское совершити тщашеся, терпя же и во время летняго настояния великое страдание от множества комаров и прочих воздушных великих и малых ядовитых мушиц. Зело бо служаща его Господеви откровенною главою во время Литургии и непраздным сущим рукам его и уязвляшеся от них до крове, иногда бо от лица и главы его и плещам всем кровию обогритися, иногда же едва жив от церкви исхождаше, толико же страдаше, но не умали законоположеннаго в пении правила и ниже поспешнее когда бы восхотел отпети и не точию сия токмо, но и иная великая страдания терпеливодушно терпяше, и в таковых доблестех пребы ту до времени мороваго нашествия яко лето и пол.

О изшествии из пустыни и возвращении во время мороваго поветрия. Глава 12

Егда же благоволи Господь Бог вся страны российския наказати достойною казнию злорастворным смертоносным воздухом за множество грехов рода человеческаго и много безчисленное множество явивши жития сего безвременно лиши и в вечное неисходство отведе, иных же от страха бежати сотвори, оставших яже в страх и трепет и великое недоумение претвори и сердца их ужасом покры. Тогда и иноческое сочетание от многих святых обителей разбегошася и в далняя разстояния раселишася, многа же места и опустошишася от смертосечения и тогда и от пустыни сея Успения Пресвятыя Богородицы яже на Фролищеве горе братства много разыдеся, прочии же и умертвишася. Тогда же и вышереченный пустынноначальник Мефодий и прочии по единому (к ним же прииде сей преподобный отец Иларион) о Господе скончашася и святыя души своя в вечное блаженство преселиша. Их же всех преподобный Иларион сподоби пречистых таин Христа Бога нашего причаститися в коегождо отшествии, телеса же их и погребаше по достоянию. По сих же начат помыслы си мужатися и ужасатися, яко остася в таковой глубокой и дивней лесной пустыни един, бояся бо бесовскаго томительства и зверинаго ядения и от злых человек губительства. И помысли слово писанием извещенное: горе единому жити от соблазн и умысли оставити ту вся и отити, таже много брався с помыслы хотя утвердитися ту неисходно, но не возможе, ибо уныние согнеташе сердечную крепость его, не имать бо никогда же слова проглаголати ему, или на ино что от уныния превести мысль его и много плакався о красоте места того да не запустеет. Таже избра день и помолився Господеви и отпев церковнаго служения определение и причастися святых Тайн, таже целова святыя иконы и пойде с великим плачем во ину пустыню стоящую обону страну реки глаголемыя Оки пребы в ней не более десяти седмиц непрестанно жалением огорчеваяся. И воспомянув обещание свое и умысли глаголя: лучше ми есть многоразличными скорбми умучену быти тамо в пустыни отцев моих, нежели оставити ю. Аще ли убо потерплю крепце вем известно яко не оставит мене Господь мой и Пречистая Богородица, лучше ми надеятися на Бога, нежели на человеков. Той бо есть помощник непостыден и весть коегождо человека предложение и Он ми да будет во всякое утешение и тако возвратився и паки прииде в пустыню перваго жилища своего и начен более перваго подвизатися един живя. Како же изреку и что возглаголю о преестественном его терпении, колико подъя бедствования скорбнаго от непрестанного без человеков уныния и колики напасти пострада от злокознства диаволя и колика страхования понесе от многих привидений явных и мечтательных и колики источники слез излия и колики от помысл томительства понесе, несмь довольно подробну тыя его терпеливодушныя страсти исчести и написанию вдати, ей глаголю: паче бо показася мучеников во всем непревратном к Богу подвижении и непоползнуся от святаго си намерения, о воистинну прекращенно глаголю: неподвиже бо ся яко мертвый, аще бо и воздрема первее от уныния, но паче зде отвердися во словесех своих. И таковоежитие препровождающу ему о Бозе в присны хцерковных и келейных молитвах утробным оком царь небесе и земли Христос Господь за молитвами Пречистыя Своея Матери и осия его светом милосердия своего и благослови место оно умножитися люботрудными и святыми мужи на большее прославление всесвятаго имене Своего и абие прииде к нему некто монах именем Иона ища себе душеспасительнаго жительства и возлюбив место оно и приим благословение и нача подвизатися. Возрадовася же преподобный яко посещен быв милосердием Божиим и бяше благодаря Бога присно, таже помалу и инии пришедше вселишася жительствовати и тако день от дне благодатию Божиею доволно братства снидеся и единодушно в теплоприлежных подвизех присно пребывающе и всещедрыя милости человеколюбца Бога на помощь призывающе и в законе Его от уст праведнаго поучающеся. Зане бяху словеса его целомудренна и исполнена духовнаго учения, бяху же молящеся и источники слез изливающе, яко да отврати Господь Бог весь гнев свой праведно наведенный на всероссийское царство и избавит от належащаго всегубительства смертоноснаго. Слышаще же таковое их благое о Бозе пребывание во окрестных ту местах жительствующих, приносяще к ним множество имений своих на созидание святыя их пустыни и поощряюще их многослезными просительствы, да болше прилежат молитвам вышеписанным, преподобный же иеромонах Иларион поучая их полагати обеты богоугодныя и несовращатисяя на первыя злообыкности. И тако по трелетном всея земли смертоносии помяну Господь Бог создание руку Своею рода человеческаго, ходатайств ради пресветлых светил всероссийских чудотворцев, изряднее же Пресвятыя Своея Матери благолсовенныя госпожи Владычицы нашея Богородицы, премилостивыя христианския надежды и предстательницы и непогрешительныя заступницы и ходатаицы, от гнева на милость претворися и устави все мирное мертвоносное губительство и разгна тмоносныя язв облацы и от воздуха дряхлость на светлость премени и ясностию солнца лучезарно просвети и людем болезненная сердца на радость преложи и здравием благослови. Тогда люди каждо (во своя си) обращахуся. Их же спасе Господь некиих ради благодетельств и истинных обетов благодетельным творением. Такожде и обители святыя паки наченше населятися прежними и новыми богоугодными и святожительными иноки. Призре же Господь на теплоприлежныя молбы сего преподобием украшеннаго иеромонаха Илариона и его подобнравнаго братства паче бо многих пречестных и великих лавр начаша стицатися в пустыню сию Успения Пресвятыя Богородицы на красную Фролищеву святожительную гору, от иноческаго же чина и от всякаго мирскаго сословия и приимше благословение терпеливодушнаго страдальца и прочих отец и жительствующе преподобным пустыни тоя обычаем. Бысть же времени некоего по Божию смотрению от дикости леса на преподобнаго лишение света очевиднаго и егда братиею приводим бываше ко церкви тогда ясно свет видя и службы совершая, егда же из церкви пойдет, тогда паки нимало что видя и сие бысть не мало время и Божиею милостью уздравися.

О явлении преподобнаго Сергия и поставлении теплыя церкве и о поучении его ко братии и о разбойническом нашествии. Глава 13

Во таковых же доблестех пребывающим им и своими рукама питающимся не мало время и по сем полагают совет благ, како бы на месте том вторую церковь поставить теплую, на собрание молитв во время зимнее и помощию Божиею леса на создание доволно наготовиши и о сем преодобный зело печалуя бяше, зане не имый что древоделателем возмездие вдати и некогда по многих трудех келейнаго си правила в тонок сон сведеся и абие ему явися преподобный отец Сергий Радонежский, глаголю: что печалуешися всуе или не веси безчисленных милостей во триипостасном Божестве славимаго Бога, той бо есть волю и хотение работающих Ему исполняет. Ты же уповай на Него дерзновенно и предначатому делу касайся, спомощник же ти и аз буду. Обещася же и спосещати его и сожительствовати с ним. Возбнув же преподобный и обрете сердце свое радости исполнено, таже и церковь по времени основа во имя Святыя Троицы, по сем же и совершися чрез подаяние неких боголюбцев и подобною лептою украсися, таже и священа бысть по достоянию. По некиих же днех чрез некое явление и ина церковь на святых вратем возградися во имя преподобных чудотворцев и тако благодатию Вседержителя Бога по мале святая оная пустыня распространяшеся, церковными же и прочими благопотребствы наполняшеся. Слава же обношашеся на многие страны о месте красоты и о душеспасительном пребывании, понеже имуще не стяжательное житие и ревнующе нравом пророка Илии и Иоанна Крестителя и прочим пустынножителем. Пища же и питие всем равнообща бысть, вредное же (всякое) и неполезное ко спасению отматаху и все тепло службе Божией прилежаху и мнози приходяще ту не точию от инок, но и от мирских человек желающе соводворитися, просяще благословения преподобнаго отца, да соизволит их сопричести ко святому своему стаду. Он же яко чадолюбивый отец радостным духом всех приимаше и на пажити спасительней присно поучая и наставляя пасяще и таковая поощрающая на подвиг словеса глаголя: "Возлюленная моя о Христе Господе братия, подвигнемся о спасении своем, елика есть крепость наша прежде даже не приспеет время, в неже восхощем, но ничтоже возможем. Помыслим убо на каковы подвиги в начале обета своего взыдохом, воспомянем убо о первых святых мужех же и женах, иже Божия любве деля всякими многоразличными добродетелеми образы подвизавшеся чрез все время живота своего, преселистася на вечное блаженство и никакоже небрегоша о плоти своея угождении, но изсушиша яко тонкое тростие своя телеса и умертвиша плоти своея мудрование постом и бдением, и жаждею,и в нощнем предстоянии в молитвах и освятиша удове телес своих, рекше: уста на молитву и на Божие славословие, очи на умилное взирание и слезы, уши на слышание закона Божия, руки на воздеяние, нозе на предстояние в молитвах день и нощь. Помыслим убо, не туждели плоть имуще якоже и мы, не в зазор ли будет нам святое житие на страшном суда Христова пришествии. Сего ради подвигнемся от всея души, братие, смерть по вся часы имети пред очима нашима и страшныя муки вечное томительство. Не попущаем, братие, веку сему малу худу сущу восхитити от нас блаженную и бессмертную жизнь ону дондеже время имамы подвигнемся прилежно о спасении нашем, препояшем чресла помышления си на подвиги душеполезныя. Не слышим ли Спасителя нашего о сем учаща нас: "в терпении вашем стяжите души ваша", помыслим убо на неже звани быхом во обещании си, не на скорбный ли и тесный путь, по апостольскому словеси (2Кор 6:1-10), во всем представляюще себе якоже Божия слуги, в терпении мнозе, в скорбех, в бедах, в тугах, в низложении, в трудех, в бдениих, в постех, в чистоте, в разуме, в долготерпении, в благостыни, в Дусе Святе, в любви нелицемерне. Сия же творити потщимся, возлюблении, ведуще убо елико внешний наш человек изнемогает толико внутренний обновляется, и да ничтоже ны разлучит от любве Божия, скорбь ли или теснота, или гонение, или каковое либо иное телесное бедство, но станем убо крепко препоясавше чресла помышления нашего и одеявшеся во броня правды, надо всеми же возможете вся стрелы лукаваго разженныя угасити, и шлем спасения восприимите, и меч духовный, иже есть глагол Божий, си речь непрестанное в молитвах пребывание и закона Господня слышание и аще убо обрящемся таковая творяще, воистинну храм Богови будем и вселится в нас Дух Святый и ни едино злолукаваго сатаны коварство возможет ны прелстит. И тако убо преподобный отец присно поучая братию сво и наставляя к шествию душеспасительнаго пути, тем же мнози сладце учению его внимающе, горкия и прелестныя тмы отступающе и ко истинному свету прилагающеся в путь выше реченный ити, аще Бог поможет устремишася. Ненавидя же добра завистодержец и враг злолютый демон лукавый, не могий терпети в нем таковаго предложения и любве к Богу, много на него подвиже и искушения и напасти чрез разбойническое нашествие и томительство, ибо многа от них претерпеваше досаждения и биения и многоразличныя болезни. Он же терпеливодушный постническаго жительства страдалец доблественне вся сия претерпеваше. Иногда же и бегством спасашеся от належащего их немилосердия, но от всех сих помощию Божиею вскоре исцелеваем бываше. Сие же все бысть не без Бога, но строением всесильныя десницы Его. Сице сотворяшеся, яко да больших почестей во Царствии Небеснем сподобится.

О созидании большия соборныя церкви. Глава 14

Аще бо и много супостат наветоваше преподобию его, но он не поползнуся доблественным си намерением и не стужи о сем никакоже, но наипаче крепляшеся, Бог же болма прославяя место оно во вся страны всероссийскаго великаго царства и братству многу стекающуся и на купно творимыя молитвы и поучение Божия закона не могущу в церковь вмещатися, вложи ему Господь Бог и Пресвятая Богородица мысль благу еже бы во пустыни той создати великую церковь и таковому благохотению его присно согнетающу сердце его во еже бы како дело оно святое возсоздати потщался и тако изобрет время внуши совет желания своего в слухи богосочетанного братства. Они же яко чаад послушлива суще похвалиша Бога и с радостию хотению его способствовати обещавшеся. Таже изобретша время подобно и сотворше молебная пения со многим умилением пачеже рещи и со слезами и на дело дерзнувше и поидоша вси вземше сечива на красный пустыни тоя бор и начаша избирати самая лучшая и толстотою удобнейшая древеса и посекаху. Помощь же Божия поспешествоваше им, приидоша к ним множество поселян от окрестных ту стран и тако милости ради Господа Бога самых изрядных красных древес довольно наготовише. По сих же совещавшеся и наченше умышляти како бо оная древеса на место превозити, идеже зданию церкве быти, но бяху зело тяжка неудобо носима и от дела вси неможением скланяхуся, инии же не хотяще трудитися и о деле не брегше от пустыни изшедше, прочих же недоумения печаль облагаше и не ведущи что сотворити и всуе толикий труд понесше изрицаху. Наипаче же всех размыслотягчаемая печаль преподобнаго отца сердце снедаше и болезнь душу его отягчаше, но не погреши в надежде упования непрестанно убо соборне же и келейне Бога на милость претворяше и слез токи изливаше и умилным гласом восклицаше: о, премилостивый Владыко и Господи, призри всевидящим си оком на пустынное место сие! В нем же мы грешнии раби Твои селение имамы, посети, всещедре, посети и не остави нас до конца, услыши же и вонми гласу моления моего и подаждь благодать Твою святую и сотвори призрение по милости Твоей на желание сердца моего. Рекл бо еси человелюбче всещедрый во своих евангельских законоположениих и повелел еси просити у Тебе всякаго ко спасению хотения глаголя: просите и дастся вам и аз грешный ревнуя словеси сему прошу богатодаровитыя милости щедрот Твоих да исполниши начинание мое и благоволиши возградитися дому святому Пречистыя Твоея Матери на месте сем яко да ту по силе нашей присно славится Всесвятое имя Твое. И таковыми убо и больше сих словеси непрестанно и з братством своим моляшеся. Призре же Господь Бог на теплоприлежныя их молитвы яко же писано есть: волю боящихся его сотворит и молитву их услышит. Вложи убо Бог хотение поселянину некоему знающему место и веру тщания оных пустынножитеелй, пришед и совеща о мзде яко да превозит им на место древия оныя условивше же ся и взем (благословение) начен труждатися и Богу помогающу за молитвами преподобнаго мало что времени к трем месяцем вся оная древеса тяжчайшею силою на ослятях си превози и отъиде и о сем преподобный со всем братством своим велми всесильнаго Бога и Пречистую Его Матерь благодарствоваша, таже послаша вестники во многие страны ко имущим хитрость церкводелания да наимшеся соделают. Приходящим же мнозем и зрящим на толстоту онаго уготованного древия и делу не внимахуся и отхождаху, а инии же и внимахуся, но цену велми отягощающе не суть толика имения в пустыни той и о сем преподобный более перваго печалию облагашеся яко не имый толикаго вдаяния. Аще лиже бы толико имел еже прошаху то никако же бы вожжалел, таково бо име благохотение и таковою печалию неколико дней сердцу его согнетающуся и многи слезы изливающу и крепость упования своего возложи на Бога яко вся Ему деяти возможно.

О вшествии ангела в келию преподобному и мзду на церкводелание вдавшу и о чюдеси Пресвятыя Богородицы. Глава 15

Некогда же бдящу преподобному во своей отходней кельице уединену сущу на молитвах и унынием вышереченным обуревающуся и абие некто тихим гласом сотворь молитву вниде к нему имый подобие путника, на плещах си котву нося. Преподобный же ужасеся и недоумения страхом обложися и по сем рече пришедшему: кто еси ты человече Божий и что вина напраснаго твоего ко мне внития. Он же отвеща: слышах опечалена тя суща и приидох посетити тя и совершенно уведати о унынии твоем, яко да скажеши ми по истине о сем. Преподобный же вся подробну ему о церквопоставлении сказа ему, той же отвеща глаголя: дерзай, отселе Бог имать ти помощник быти, аз же пошлю ти скоро удобных церкводелателей да их же хощеши избери. Таже взем из кошницы два сточисленных мешца полна суща и вручи ему глаголя: недостает ли ти твоего перваго имения, сия вдавай хитрецем и совершити имаши и посем изыде из келлии его и к тому невидим бысть. Преподобный же от великия радости облияся слезами и сказа неизреченное Божие милосердие всему братству своему, они же теплоприлежными мольбами слезоточне Господа благодариша яко удиви милость Свою с ними. По сих же много снидеся имущих хитрость церкводелания и друг пред другом тяготу цены умаляюще, таже согласившеся на дело дерзают и тако с молитвами предподобнаго церковь основавше крестообразну на месте первыя згоревшия церкве и именем тым же во имя Успения Пресвятыя Богородицы и с приделом преподобнаго Ефрема Сирина и тако день от дне помощию Божиею делающее, достигше убо до того, яко древия на дело дебелыми ужи возносити и бяху изрывающеся ужа от тягости великих оных древ. Купующе же изменяху ужа, но и та такоже изрывахуся. Преподобный же и о сем не мало поскорбе, но возложи упование несовратное на Господа Бога яко не имать дому матере Своея оставити и взем образ Пресвятыя Богородицыи взыде на дело и соверши теплою верою молебная пения. Таже сплетоша ужи лыкоплетенное и тако то утвердися милостию Пресвятыя Богородицы яко и всей церкви совершитися но ни единою прервася и тако за поспешением Божиим единым летом и верх пятоглавный на церкви той устроися. По сем же и украшена бысть достойною благолепотою и доброхитростным иконописанием и иною церковною утварию подаянием различно градских боголюбителей, таже и звон доброгласный устроен бысть. Приспевшу же времени абие и священ быв прежде предел церковный во имя преподобнаго отца нашего Ефрема Сирина и ту чрез все зимнее время пение Литургии сотворяху и великую студень терпеливодушно терпяху. Прешедшу же времени зимнему и в настоящее лето освящена бысть и соборная Пресвятыя Богородицы Успения церковь по достоянию и о сем преподобный со всею братию си духовнаго радования наполнишася и благодарственная пения восписующи яко не остави их Бог Всемилостивый тщи вопрошений их и сотвори по воли святей Своей с ними исполни желание сердец их. Слава и хвала Вседателю Богу буди яко не оставляет рабов Своих во всем помоществуя им.

О распространении пустыннем и о странноприимстве и о бывших чюдесех, молитвами преподобнаго. Глава 16

По поставлению же и освящении великия сея соборныя церкве болша прославися святая пустыня сия и множество братии бяху сходящеся и добре Христу Господу работающе, он же яко чадолюбивый отец с радостию всех приимаше и на пажити духовней наставлением пасяще, не точию же монашествующих единых приимаше, но и мирян и убогую чадь, желающих же ангельскаго образа сподобитися первее обучаше искуситися иноческих заповедей творению и да утвердит себе к терпению скорбей и к воздержанию страстей и ко умножению подвигов и прочих монашеских детелей и сим всем сам во образ всех благих являшеся. По сих же и присоединяше их постризеся ко иноческому сочетанию, предаваше же их доблеразсудным старцем в покорение и послушание, не на 40 дней, якоже в некиих обителех чин обдержится, но на весь век жития старча и товый же обычай и до днесь в пустыни той соблюдается неизменно. Настоящее же паки обновляется и таковая преподобнаго отца и прочаго братства богоугодная добродетель и ангелоподобнаго жития слава повсюду обтицаше. Они же наипаче благодатию Божиею возрастающе и всетепло службе Божией прилежаху и по сих преподобный Богу научившу и начен к пустыни той соделовати и частоту леса посекати и чрез блата мосты творити да более путь размножится на пустыню тую. Не обретеся бо ни един от братии его таковым усердием работая во всяких трудех яко бы безплотен на вся подвизаяся, а не изнеможе телом от великаго трудоусиления. Каковым ми словом возмощи изсказати неизреченныя преподобнаго люботрудия или како имам изъяснити досточюдныя его детели и от великаго ми недоумения омрачается мое помышление и от великих и неизглаголанных худостию моею малейшая восписую. По вся убо дни труждаюся збратиею дрова секий и в пустыню носяй и прочая потребная делая и зелия на пищу собирая и на время зимнее уготовляя и церковную службу совершая. Нощи же наставшей бодрствоваше на молитвах и в безсониих сопребываше и многими поты обливашеся на земных поклонениих и теми муча тело свое да сокрушены будут вся плотолюбивыя похоти его, также присно и на бдениих си слезоточныя струи из очес своих проливая, небеснаго Утешителя на помощь призываше и со богодухновенным псалмопевцем совосклицая: воздаждь ми радость спасения Твоего, такожде по сих и в поучении книжнаго прочитания не мало время провождая и братству си в слухи доблеразсудными глаголы вношаше, они же яко благопослушливая чада с великою радостию внушаху глаголемая от него.

О странноприимстве и о роптании братии. Глава 17

По днех же некиих от некоего Божия вдохновения возвести братии своей да будет в пустыни их страником питание яко да всяк мимо грядый питаем будет богоданною им пищею и елико благодеяние будем творити им имам вздаяти нам богатодарно благодать Божия, яко та суть спасительная заповедь евангельская и тако наченше творити чрез много времени долготу, заповедав же им яко и по нем творити имут тая непревратно, аще ли случися когда и скудости быти во изобилии пищепитания, тая же да не имут оставити, яко же и бысть во времена в няже благоволи Господь Бог за грехи наши наказати ны нерождением хлеба, вышереченнаго же странноприимства не измениша. Достоит убо зде и благодеяния Божия бывшая в той пустыни воспомянути. Бысть бо в лета она у них великое оскудение хлеба и братии всей негодование на преподобнаго деюще яко всех страннопришельцев питаше, оскорбляющеся же и порицаху яко по мале времени сами имут глаголюще гладом таяти и оставити то немысленно преподобному советующе. Он же тихими словесы утешаше я глаголя: не скобите, братия моя, и не пецытеся о сем глаголюще что ямы. Весть бо Господь яко требуем сих всех и не оставит ны гладом таяти, аще будем Ему угодная творяще, но точию веруйте яко примете и будет вам и тако пребывающим им Господь посылаше им пищу руками боголюбивых человек. Иногда же точию едина мера муки остася, но Бог благоволи ю сице, ибо вземше ю изнесут на растворение хлебов и паки толикоже останется, паки же намеривше изнесут се толикоже обрящется и тако бысть чрез многое время. Некогда же мнети им яко уже вся истощишася и стоящем у Божественныя Литургии и по отпусте же усовветовавшим некий от них отъити от пустыни той и абие некто пришед и вдаде преподобному тридесять хлебов зело великих и ядше их не малое время пребыша, паки же некогда посла преподобный некоего от ученик своих до града Гороховца ко имущим довольство хлеба многое, ибо бяху знаеми яко да вдадут ему на препитание взаим двадесять мер жита. Они же отослаша его тща глаголюще: рцы наставнику вашему яко чюждым богатством хощет весь свет препитати и тем спастися, той же отшед сказа бывшее и абие приидоша человецы нецыи в пустыню их и слушавше молебная и вдаша преподобному сребра куплственнаго довольно и отъидоша. Он же вельми благодарив Бога и рече ко братии: се зрите братие како печется Бога нами, вы убо не хощете странником укруха вдати, нам же подает Бог и тысяще сугубо. Таже паки посла тогожде ученика в той град и повеле на вданное сребро купити жита, той же дошед и купи более дву сот мер, удивишежеся тии иже не хотеша взаим дати и абие послаша туне жита довольно и тако питающеся и питаху, докеле же Бог посла лета хлебородная. Не достоит же глубине забвения предати и сего Божия милосердия яже умножи им и в варениих обилие, ибо аще когда случится питати странных сто человек и более, иногда же пятдесять или двадесть или менше, овогда же и ни единаго кроме самих себе, сосуде же в них же варение творяшеся все едины бяху и что себе уготовивше тем же и странных напитают без прибавления, тако убо благословляет Премилостивый Господь Бог хранящих святыя Его заповеди.

О клеветании его ко святейшему патриарху и еже како умертви было некто от братии его. Глава 18

Некогда по наущению супостата врага оклеветан быв преподобный (неким боганебоящимся человеком) ко святейшему патриарху Никону. Яко бы новоисправныя книги порицает и службы по них не совершает и взят быв во царствующий град и послася в монастырь Михаила архистратига зовомый Чудов ко архимандриту Павлу да свидетельствуется во священнослужении. Той же архимандрит прилежно созерцая его чрез четыредесят дней и ничтоже обрете в нем порока достойное и абие с великою честию отпущен быв во свою пустыню и тако постыдися сотворивый на преподобнаго ложное оклеветание. Достоит же зде воспомянути и терпеливодушное преподобнаго от некоего брата си страдание. Учащу бо ему свою братию дабы пребывали безъименным житием, но некий брат посылаем бе на службу монастырскую и от монастырскаго имения бе утаивая, собра себе серебра пять рублев, упрямством си отягощен быв, не не слушая преподобнаго учения и сребролюбием недугом омрачашеся таяше в келлии свое (неколико сребрениц), уведев же преподобный и повеле нуждею взяти у него во пустынное хранилище. Огорчижеся брат оный на преподобнаго явным диаволим наущением и положи на мысль свою еже бы преподобнаго убити смертно и по многая времена глаголаша ему яко повелевает ми диавол сечивом умертвити тя в день пятка. Преподобный же увещеваше его глаголя: хранися, брате, крепися и не слушай злолютаго сего веления, но ограждайся страхом Божиим, сам же о сем не приложи опасения, но вся тая козни лукаваго демона быти вмени. Во время же некое усмотрив окаянны время соделанию си удобное идущу бо преподобному от утреннего пения уединену вышереченнаго дня начинание и оный брат скрыся за дверьми келлии его, вшедшу же преподобному и абие напрасно сечивом хотяше по шии уязвити, но разсече рамо близ шеи, понеже секирою заде брус в сенях сущии тем и погреши и егда ударен быв паде яко мертв и от множества крове обагрися весь помост сенный. Брат же оный ужасом связася и страхом окаменися сердце его и повтори сечивом коснуся, но не возможе, ибо испаде из руку его. Уведевше же братия и прибегше подъемше преподобнаго яко мертва, онаго же убийцу связавше и хотяше своими руками умертвити его, преподобный же ничтоже зла повеле сотворити ему, убийца же по мале времени умре.

О еже како нача преподобный знаем быти благочестивейшим государем. Глава 19

По сих же преподобный нача знаем быти и царски сигклитом за многое си святаго жительства обдержание и от них приимая многая во пустыни си подаяния да теплоприлежными его молитвами приимут грехов оставление и благих получение, таже некий от них внесе во слухи и пресветлейшему во благочестии великодержавному государю нашему благочестивейшему царю и великому князю Алексию Михайловичу всеа России самодержцу о превеликих преподобнаго подвизех. Он же государь благоволи его пред собою поставити и егда предста многая душеполезная глаголя словеса, видев же его самодержец от многаго поста и воздержания зело изсохша и слыша от уст его яко источник душеспасительная словеса текуща и возлюби преподобнаго и вопроси его что и откуду пищу себе в толицей пустыни приобретаете. Он же рече подянием боголюбивых человеком и собиранием своими руками лесных плодов, благочестивый же восхоте ему отчины на препитание вдати, он же не прияти их моляшеся. Удививжеся царь кротости его и нестяжанию и рече: к предстоящим своим яко перваго сего человека созерцаю нежелающа отчин приятия и с честию отпущен быв молити за ся рекшу государю и за весь царский дом его. По сих же повеле грамоту во град Гороховец отпустити яко да пределы града того будут воинский хлеб в пустыню преподобнаго вдавающе и отписи у них приимающе. И тако благоизволением царским то исполняшеся. Мнози же и от боляр различными даровании вкладчики возобретошася, преподобный же и со братством своим Бога святаго моляще за ня и жтельствоваху прежде воспомянутым святожительством си пребыванием неколико времени прешествие.

О чюдоделании его и о терпеливодушном от разбойник страдании. Глава 20

Случися убо некогда попущением Божиим во царствующем граде Москве в нищих жилищ доме от некоего чародея и богоотступника напущен быв бес злолукавый и многи сотвори жителем ту пакости и одоле дом и изгна я. Слышано же бысть о сем и благочестивейшему государю и повеле многим духовнаго чина человеком многия мольбы тамо сотворяти и со святыми иноками ходити и благоуханным фимиамом кадити и священною водою кропити, таже многими времени совершаемо бы и ничтоже возможе ползовати, но и больше пакости беса огорчивше, ибо не имуще на то к Богу всеистиннаго сердечнаго предложения. По сих же вдохну благодать Духа Святаго в сердце благочестивейшему государю воспомянути о преподобнем пустынножителе сем Иларионе и абие посла по него во пустыню его и прииде и моли его да помолится Господеви Богу о изгнании беса от места онаго. Преподобный же по многом отрицании не могий воли царевой сопротивитися и положи упование на Бога и вшед в дом оный сотворяше молитвы и не по мнозе времени изгна его. Прежде же изгнания многажды преподобный и с сущими с ним глас бесовский слышаше, точию же и не видяще его и разглаголуя с ним множицею. Егда же преподобный на глас его кропя священною водою, тогда бес от места на место пребегая крыяшеся, по сих же вопроси преподобный глаголя: чает ли он страшнаго Христова пришествия и вечных мук томительства. Той же отвеча унылым гласом яко всем прилучившимся ту слышати: о горе нам по страшном том пришествии от нестерпимых огненых мучительств, увы, увы нам яко егда и помыслим о сем, тогда от боязни зело трепещут вси удове наши, но не единым убо нам будет горе и вашего человеча рода грешников лютое горе. По изгнании своем бес к тому уже не возвратися, но исчезе проклятый и тако Господь Бог молитвами преподобна и постом даде паки жительствовати ту безпакостно и того ради одарен от царя прииде в пустыню свою. Не точию же сия токмо преподобный содела, но и болящия многи в различныя времена теплыми мольбами своими исцели. Но не вознесе помышления своего и на паче пред Богом и человеки все истинно кротостию и тихостию смиряшеся и хуждши всех вменяшеся, червем а не человеком нарицашеся и живяше в пустыни преспевая день от дне спасительным подвиги. По сих же наусти на него враг доброненавистный не милостивых разбойников ибо пришедшее мучаху преподобнаго и связавше ему руце и нозе и пронемше древо на огни мног час жгуще его и просяще имения от царя и боляр вданнаго. Он же молчанием загради уста своя и ничесоже отвещаваше им точию мольбу ко Господу возсылаше. Они же видя его утомленна и оставлше отидоша и по неких днех паки пришедше и тем же образом мучаще его, он же паки терпяще от суровства их. И многажды приходяще томляху, он же чрез сильно терпяще, иногда же и скрывашеся, иногда же и бегством спасашеся, от болезней же помощью Божиею вскоре и здравость тела приимаше. Имение же в различных местех сокрываше. Его же ищуще много и необретше со стыдом отхождаху.

О страховании бесовскаго мечтательства. Глава 21

По сих же диавол больше вооружися на преподобнаго и посла на него проклятое темномрачное воинство свое, иже бысть си сицевым образом. Некоея бо нощи утрудився преподобных в великих подвизех келейнаго си правила и воздрема и абие страх великий нападе нань. И се множество бесов имуще различная страхообразная лица си вшедше в келлию его яко гладни волцы и крикнувше страшно похватиша его за нозе и влечаху в великий ров и глубокий яко бы и дна не имети ему мняшеся, вопиюще же и зубы своими на него скрегчюще овии же копиями, инии же иными оружиями умертвити хотяще преподобнаго и всячески страшаще его, он же не могий силою си двигнутся и ниже им в руках власти положити на ся крестное знамение и ниже могий языком молитву проглаголати связаша бо ся стению их вси удове его, точию же умильно единою памятию си моляшеся: о Пресвятая Госпоже Владычице моя Богородице Царица Небесная, помилуй и ине остави мене погибнути. Влечену же бывшу ему и абие узре два юноши зело краснообразны и воззва умом своим: о святии Божии, помозите бедству моему, узрев же их окаяннии они и яко прах от ветра разбегошася оставльше преподобнаго и очутився весь трепеща и начен со слезами молитву творити Иисусову и едва страх утоли знаменовся крестным знамением и глаголя молитву "Да воскреснет Бог" и по сем помощию Вседержителя уздравися. Многа же и ина пострада преподобный от явных и мечтальных демонских наветов о них же несть ми мощно подробну исписати и явленно сотворити, такожде и о подвизех его душеспасительных и о трудех телесных от великаго ми удивления не возмогох расплодити умом моим, но точих вкратце о жизни его беседую. Пребысть же преподобный довольна лета в пустыни той и до лета благочестивейшаго царя Феодора Алексеевича.

О пришествии царстем на пустыню и о люблении места и преподобнаго. Глава 22

По преставлении же великаго государя нашего царя и великаго князя Алексия Михайловича, восприим скипетр правления самодержавнаго благородный сын его великий государь наш богодарованный царевич и великий княз Феодор Алексеевич всея великия и малыя и белыя России и бысть царь пресветлаго величества своего многими добротами преобогащенный и великаго рассуждения преисполненный и любяй благолепие святых божиих церквей и исполнитель закона Божия, всеусердно же любя и святыя душеспасительныя обители и в них иноческое о Господе сочетание и всяческими своими безчисленными царских сокровищ подаянии милуя и украшая и преходя созерцая многая святожительных мест состояния. Внесеся же от некиих во благочестивая слуха его и о месте Фролищевы горы и о святом пустыни тоя трудолюбцев пребывании и о крепчайших преподобнаго подвизех и о прочих терпеливых его благоудобствах и чюдоделиих. Слышав же он премилостивый государь и похвали Бога яко таковый обретается во времена благочестиваго царства его. По сих же и вдохну ему благодать Святаго Духа желание да бы всесветлыми очесы си созерцати ту вышереченную красную Фролищевы горы пустыню и изобрет время удобно сотвори царское шествие си от града во град, таже и до пустыни красныя Фролищевы горы и бысть пришествие его в ту вышереченную пустыню лета 7186 (1678) в начальных числах неомвриа месяца, его же пресветлое царское величество преподобный неизглаголанною радостию духа обстоим за много верст срете. Вшед же благочестивый во пустыню и быв у церковнаго вседневнаго пения и зелопохвали церкве благолепие и чин таже преходя и любуя красоту селения. Возлюбив же и преподобнаго за многия душеполезная словеса и книжное скоропостижное разсуждение зане много беседующе бяху таже преподобному и о каменной церкви усердствовати повеле и место на созидание показа, по сем же и милостыню довольну даде и обстоимыя тамо земли приписати повеле и солеварню даровати изволи им, таже и оружия довольно хранения ради от разбойников вдати повеле, присутствующу же во царствующем граде во царский дом свой смело входити рече. Быв же неколико время в пустыни и отъиде во царствующий свой град взем и преподобнаго, тамо же и дом получения ради вдаде и тако присно ходя ко благочестивейшему и много от многих вещей беседующе бяху.

О созидании каменныя церкве и вдаяниих царевых на пустыню и о явлении Пресвятыя Богородицы. Глава 23

По сих же прият от руку благочестивейшаго и на созидание в пустыни си каменныя церкве некия удобная, от имения же и прочих потребств, видя же милость цареву боляре и князи и такожде преподобному от имении своих подаваху и отпущен прииде во пустыню храним миром Божиим. Сие же бысть и ни единою, по сем же наим преподобный плинфоделателей и бяше сам присно назирая делание, такожде повеле трудником и камение уготовляти и возити. Неций же от ученик его утаено в сем деле спомогаху, ибо во время полунощное исходяще и на гору камение вознося и на месте полагаху. Такоже и иная потребная довольна уготовляше, по сем же сообретошася и хитрецы на делание и сложившеся о мзде на дело дерзнуша. Егда же наченше рвы копати тогда и начальника пустыни преподобнаго Мефодия тело цело и нетленно обретоша, такожде и отца его мощи и взем я преподобный Иларион с велиим благоговением и положи среде основания новыя церкве. По сих же уготованным камением якоже обычно рвы наполнивше и пев преподобный молебная и основание по церквообычному состоянию положи лета 7189 г. сентября в 1 день. По прешествии же зимы в настоящее лето наченше с Богом и делу касатися. Пресвятыя же Богородицы предстательством спешно делашеся. На дело же прежде восхождения солнца неким гласом взываеми бяху и делаху и тако объедино лето и совершивше. Недоставшу же нечто имения печалию обложися преподобный и некоего утра по отпусте пения вниде в пекалню и седе размышляя и в сон тонок сведен быв и зрит Пресвятую Богородицу вшедшу к нему со двема девицами и рече ему: что печаль твоя всуе тя утесняет, престани отселе, аз ти имам во всем помоществовати еже хощеши, таже и иная некая словеса ко утешению преподобнаго изрече и бысть невидима. Убудився же и обрете радостию сердце свое наполнено. По днех же некиих пойде до града Гороховца да возмет взаим от неких недостатка довольное зане скорость ко удобности имения сообретеся, идущу же ему и абие сретоша его неции мужие идущу в пустыню его помолитися и возвративше его и певше молебная и вдаша преподобному толико елико бе потребство на вдание делателем и отъидоша. Преподобный же по сем и прежде сего многажды ходя во царствующий град ко благочестивому государю и многая потребства на созидание церкве приимая. Повелено же бысть ему государем да изберет царская врата великая и красная у имущих я и тако обрет и улюби я и возвести ему государю. Он же вда из сокровищ своих царских всю цену их, по сих же и колокол великий от государя сицевым образом вдан бысть. Бывшу же преподобному некогда в палатах государских и беседуя много со благочестивейшим о многих ползодетельных вещех и повеле государь в колокол ударяти (бывшу же ему на царском дворе от лет отца его государева) и гласа его начен с преподобным слушати и абие некто от предстоящих глагола преподобному, како святый отче мниши о сем и что глаголет возглашая колокол сей, он же отвеща Бог весть. Той же рече: глас его есть биющий челом государю, да отпущен будет на Фролищеву пустынь жительствовати, покланяйся ему государю благочестивейшему за сие. Преподобный же благодарив Бога поклонився государю. Он же рече: да будет во обители Пресвятой Богородицы и преселен быв, такоже повеле государь и хлеб из волости всеголицкой на пустыню даяти и рыбу из Нижняго. И тако убо любляше царь преподобнаго яко и царицу избрати себе государю повеле. Он же по воли его сотворив и избра благолепнейшую девицу от Грушевских рода, Агафию Симеоновну, с нею же и сочетася благочестивый государь законом брака и зело царски возлюби ю. Но смерть не милосердия не дала лет довольных ему государю с нею пожити во благосоветии, но посекла ю по рождении благородного царевича Илии Феодоровича, о ней же великий государь зане опечалися. Его же преподобный утешая время многое, и о сем сокращено да будет. По многих же даяниих обещася государь на освящение церкве сам пришествие сотворити. Преподобный же украшая церкве лепоту и исполняя вся удобная с превеликим тщанием, многия же хитрописаные иконы и от старой великой церкве пренесе, юже и разобрати и место чисто устроити повеле и всеми потребствы по достоинству новую украси.

О втором государевом пришествии в пустыню и о освящении церкве. Глава 24

Егда же благолепие церковное все помощию Божиею и предстательством Пресвятыя Богородицы совершися шед преподобный ко благочестивейшему государю и возвести ему о совершении церкве и ко освящению готовность и отпущен быв отъиде устрояти потребная. Лета же 7190 (1682) года во днех месяца октоврия бысть пришествие великаго государя царя и великаго князя Феодора Алексеевича всеа великиа и малыя и белыя России самодержца на ону вышереченную Фролищевы красныя горы пустыню и священа бысть новая каменная Успения Пресвятыя Богородицы церков преосвященным Симеоном митрополитом Смоленским и Дорогобужским окотврия в 3 день. И многою царския милости милостынею одарена бысть пустыня та. По сем же благоволи государь от пустыни ити во град Суждал изволив же и преподобному сошествовати. И быв во граде Суждале и созерца престол архиепископский бывшу бо тогда на время царскаго пришествия архиепископу Павлу, и ту вложи Господь Бог на сердце благочестивейшему государю, дабы престол той преподобному поручити еже и бысть, но име совет сей тайно. По сем же и во царствующий свой град государю пришедшу с ним и преподобный. И часто ходя к государю беседующе много от Писания, неведый же о себе царева предложения. По сих же вышереченный града Суждаля архиепископ Павел изволением великаго государя и благословением святейшаго Иоакима патриарха переведен бысть на престол рязанския митрополии. Суждальская же архиепископия остася до времене праздна и по сих моли благочестивый государь отца своего и богомольца святейшаго Иоакима патриарха дабы хиротонисал архиепископом граду Суждалю преподобнаго Илариона. Святейший же патриарх ведый его мужа праведна и святое житие преходяща от многих бо лет и знаяше его, и сего ради царской его воли не пресецает но и согласует, такожде и день поставления назнаменан бысть има. О сих же преподобному никакоже ведевшу.

О избрании преподобнаго на архиерейство и о явлении чюдотворца Николая. Глава 25

Мало же нечто по сих благоволи государь благочестивейший преподобному да совершит священнодейство Божественныя Литургии в верховой у него церкви, он же по обычаю ко служению готовляшеся и всю нощь без сна в молитвах и чтении книжном препроводи и уставное правило соверши. Утро же начен ко причащению молитвы глаголати и по совершении правила от многаго труда мало седе и в тонок сон сведен быв и абие зрит на себе мандию архиерейскую со скрижалями и явися ему преподобный великий святитель и чюдотворец Николай имый в руках своих сосуд мира святаго и приступль помаза его глаголя: от сего времени имаши быти архиерей. Содрогнув же ся преподобный и обоня в келлии своей благовоние мира, удивив же ся и неведый что будет видению знамение. Приспевшу же времени и соверши святую Литургию, царь же прилежно смотряше нань и по скончании глаголя преподобному: благодать Божия тобою действоваше, но отселе Дух Святый избирает тя Суждалю граду архиерея. Преподобный же отвеща. Вседержителя Бога воля до будет, а аз бо несмь достоин таковаго великаго чина восприяти, но и слышати о сем страшуся. Царь же отвеща: не противляйся, отче преподобный, Духа Святаго благодати, аз бо вем яко на то уже осенил тя есть. И тако в то время до келлии своея отпущен быв и бяше размышляя много печально и положися на волю Божию.

О поставлении на архиерейство преподобнаго. Глава 26

Приспевшу же времени и абие и с крестовой святейшаго патриарха полаты посланы быша ко преподобному по чину избрания архиерейскаго Успения Пресвятыя Богородицы протопоп и протодиакон и прочии и вземше по достойности ко святейшему патриарху на избрание, по сих же и хиторонисан быв ахриепископом граду Суждалю, того же 7190 лета декемрия в 11 день и от того числа совершал 40 дней Божественныя Литургии священнослужение архиерейскаго вчинения и воду освящая сам благочестивейшему подаваше. И того ради паче перваго любим от царя и боляр его. По сих же и вторую благоудобренную девицу благочестивейшему в царицу по изволении его избра от рода Опрксиных именем Марфу Матфеевну, юже государь подобно первей возлюби и всякими благодаровательствы ахриерейство его почти. На красную Фролищеву же пустыню и вторый колокол вдаде. По сих же Божиим благоизволением и великаго государя намерением и митрополитом тому же граду устроися того же лета в 25 день марта месяца. В таковей же превеликаго государя сый всемилостивой чести не взгордися и не вознесеся, но наипаче кротостию возновляшеся, ревнуя душеспасительным Христа Бога нашего евангельским словесем глаголанным сице: научитеся от Мене яко кроток есмь и смирен сердцем. Та словеса опасно во христолюбивой свей души сохранити усердно тщашеся, даемая же от великаго государя не употреби во свое келейное хранение или другом и знаемым паче же и сродником в подаяние, но вся истощаше на украшение церковное и ризницы во умножение. В приложение же паче обычных в пустыни пищей не соизволи вкушати ничесоже, упояющаго же в пиянство пития ни очима си восхоти созерцати, но и приобыкших в том весьма ошаятися завещеваше. В домы же болярския и княжеския и иных господствующих человеков на обеды и вечери никакоже внити покусися, но ниже и помысла на се привнесе, но и кратце рещи от всех мирообдержательных братии своея обыкностей уклонися. Вся же любославная и тщеславная временныя чести пренебрег оплева, прежних же богоприятнейших си деятельств не умали, но и больши размножая и тако ему во царствующем граде пребывающу случися неведомым Божиим промыслом благочестивейшему государю нашему царю и великому князю Феодору Алексиевичу всеа России болети, его же просвященный сей митрополит присно утешая и срадостию терпети скорбь Бога ради обучевая.

О преставлении царстем и о умирении воинов и о пришествии его во град Суждаль. Глава 27

По сих же не благоволи Господь Бог ему государю лет жития его продолжити, но изят от телесе святую и преблаженную душу его и пресели в Небесныя обители идеже радость неизглаголанная и глас чистый и преудивленный тамо вселшимся и соводвори ю ту на вечное со прародителми его упокоение. Бысть же сие того же 7190 лета месяца априлиа 27 числа, его же государеву отшествию преосвященный он неотступно предстоя и рукама си поддержа и удобная молитвопения соверши. По погребении же блажайшаго его телесе смятошася воинствующии невемы от каковаго случая и многу досаду благочестивейшим государем нашим Иоанну Алексиевичю, Петру Алексиевичю всея России самодержцем нанесоша и от сигклита их царскаго многих боляр и князей смертию побиша. По сих же великим страхом ужаснувшеся и недоумением от всюду объяшеся и не ведущи что сотворити и како их государей на милость преложити и припадоша ко преосвященному сему. Он же шед с ними во пречестную Всесвятыя Троицы и преподобных отец Сергия и Никона обитель ко благочестивейшим и вместо великаго мщения и смертнаго кажнения прощение и милость исходатаив. По сих же и на престол си богопорученный во град Суждаль отпущен быв и прииде и достолепно от священнаго собора и прочих градожителей сретеся. Вшед же в соборную Пресвятыя Богородицы Рождества церковь и совершив Литургию, принесе же и безкровную о царех и патриархе и о освященном соборе и о всем христианстве, о граде же и людех жертвоприношение и теплоприлежную молитву, таже возшед на амвон и начен проповедати слово Божие и учити не хитрыми словес издательствы, но удоборазумными и простейшими к познанию вси слышавше дивишася богоблагодарственне такове учительне пастыре, зряще бо яко реку многоводну истекающу от уст его на употребление целеб греходетельных. Таже и на всяк день во время жития своего услаждаше слушателей присным учительством от закона Божия, обновив же во всем обветшавший дом архиерейский по достолепной обыкности. Таже и соборную церковь святыми иконами чюдно украсил есть и ина многа архиерейских приличеств возсозда инове, конечнее же рещи во всем не в дольних, но в горних взысковаше и нескудельное, но златое произволение присно имущи, не дрова, не сено, не тростие, но честное и драгоценное камение выну назидающи. О нем же вся подробну на малом сем писании удобее исписати не мощно ми есть. Разве кто от многих ученых человеков на се дерзнет, тому бо мощно и едино слово противу всех сих много усугубити о Христе Иисусе Господе нашем Ему же слава от всех сил небесных, купно и нас грешных земноживущих человеков и от всея видимыя и невидимыя твари и ныне и присно и во веки веков. Аминь.

Сия быша писана при животе еще его архиерейском за много лет до скончания его. Сию историю писанную от Григория диакона иеромонах Мефодий прочте и виде в ней яко в некоторых делех (якоже он от уст самаго преподобнаго Илариона митрополита слышал бяше) разгласие, тем повеле во оных на краех истинная извещения написати, да не будет впредь чтущим и послушающим жития его раздор и несогласие.

Летопись вкратце о житии (писано другим переписчиком) Инде глаголет, отец его служил в Зачатейском монастыре девиче в Нижнем Нове граде. А преселися отец его в вес Кириково близ Лыскова и обители преподобнаго Макария. А 5 лет осироте от матери своей, отец же его отиде на Юнгу в монастырь и пострижеся, ту и скончася. Он же остася от рождения 15 лет пострижеся же в лето 7161 (1653) в 13 день от Павла епископа коломенскаго и во диаконы поставлен того же лета марта во 2 день, а в 7162 (1654) септемриа в 3 день отпущен во Фролищеву пустынь и от Никона патриарха во священноинока посвятися того же года мая в 3 день и поживе ту 29 лет и от том возведеся на престол архиепископства во град Суждаль в лето 7190 (1682) декабря в 11 день, того же лета марта в 25 день митрополитом в том же граде учинися и бе ахриерействуя в Суждале 26 лет и 3 дни. А преставися преосвященный Иларион митрополит 7216 (1708) лета месяца декемврия в 14 день, всех лет жития его бе 76 един месяц и три дни.